الحقوا اتنين بيحبوا بعض فى المنتدى

الأربعاء 22 يوليو 2009, 9:47 pm

دي قصه حب على المنتدى

تعالوا نشوف التفاصيل و نعيش مع اصحاب القصه

القصة ان محمد و أسماء

عضوين فى المنتدى

بينهم قصة حب كبيرة واتفقوا على الجواز

والمفروض ان محمد هيفاتح اهلة علشان يروح يتقدم

محمد بيكلم والدتة

محمد/ مساء الفل ياست الكل

الأم / ست الكل ؟ هو انهاردة عيد الأم؟

لا دا لسة بدرى

الام / تبقى عاوز فلوس

محمد / فلوس اية بس احنا بينا الحاجات دى برضه ؟

دا أنا جايبلك مفاجأة

اليوم اللى كنتى مستنياة من زمان

الام / خير

محمد / انا ناويت اتجوز

الام / لووووووووووووووووووووووووووووووووووول

ياألف نهار ابيض يادى السعد يادى الهنا

اخيرا سمعت كلام امك وهتتجوز شوقية بنت اختى

البت بطة دى بنت حلال و.......

محمد / بس بس بس بس بطة اية وفرخة اية

حد جاب سيرة شوقية ؟

الام / نعم نعم ومالها بطة ان شاء الله

اوعى ياواد تكون حاطط عينك على واحدة من بتوع اليومين دول ؟

محمد / متخافيش دى محترمة جدا واهلها ناس طيبين

الام / ودى تبقى مين المزغودة ؟ وعرفتها ازاى ؟

محمد / اسمها اسماء وزميلة ليا فى المنتدى

الام / فين ؟

وانت اية اللى وداك الحتت دى ؟

اتاريك بتتأخر برة كل يوم

محمد / بس بس بس بس

اتأخر اية المنتدى دة على النت

الام / نت ؟

هى دى البت اللى بتيجى تاخد الفلوس منك كل شهر ياموكوس ولما أسئلك تقولى فلوس النت ؟

اتاريك عمال تحول منى فلوس أول بأول

محمد / يا حجة افهمينى المنتدى دة مكان على النت بنتجمع فية وبنتكلم مع بعض كلنا

وبنكتب مواضيع كتير انتى مش بتشوفينى بقعد بالساعات على الكمبيوتر ؟

الام / واية يابنى اللى دخل الكمبيوتر فى الموضوع دلوقت ؟

محمد / وبعدين بقى

منا بكون قاعد الوقت دة كلة فى المنتدى معاها

الام / معاها ودى فين ابوها اللى سايبها تخرج وتقعد معاك الوقت دة كلة ؟

محمد / انا بكون هنا فى بيتنا وهى فى بيتها وبنتكلم على النت

الام / وانت شايفها كويسة البت دى ؟

محمد / بقولك محترمة جدا و بتحبنى جدا

دى بتشارك فى كل مواضيعى اللى بكتبها

وكاتبة بحبك فى التوقيع بتاعها
وبطلعني من لعبة السجن اكتر من 5 مرات

الام / سجن ؟ يالاهوى

وانت اية اللى كان دخلك السجن يا واد

ومخبى علينا ؟ وكمان 5 مرات

اكيد اتخانقت فى الشارع بسبب الست هانم

محمد / دى لعبة والله على المنتدى وكل مرة كانت بتيجى وتخرجنى

الام / بتخرجك من السجن

هى محامية ؟ ومالها بطة بنت خالتك ماهى معاها دبلون تجارة قد الدنيا

وست بيت شاطرة ومش بتاعة اقسام ولا سجن

محمد / يادى النيلة انا مش هعرف افهمك حاجة خالص

الام / ان شالله عنك مافهمتنى ياموكوس

انا فاهمة كل حاجة

يلا ياد هاتلى قناة الحكايات علشان اشوف المسلسل

ولما يبقى يجى ابوك يبقى يتصرف معاك

قال مش عاجباة شوقية قال

الخميس 23 يوليو 2009, 8:41 am

ههههههههههههههههههههه
من محمد ومين اسماء
أنا أول مرة أسمع عنهم
على العموم الف مبروك وانا طبعا معزوم

الخميس 23 يوليو 2009, 10:51 am

هههههههههههههههههههههههه

شديده اوى القصه دى

تسلم ايدك يا موها

الجمعة 24 يوليو 2009, 5:09 am

يا دماغك يا كبييييييييييييييييييييير
تسلم موها
قصه جامده اخر حاجه
بس يا ترى ابوه عمل ايه لما وصل!!!!!!!!
لو حبوا توصيه كده وسيط كده ماذون كده
انا هنا
والحاجه الساقعه عليا والجاتوه كمان
اكتر من كده مفيش عشان الحاله الماديه لا تسمح
الحقوا اتنين بيحبوا بعض فى المنتدى 667

الجمعة 24 يوليو 2009, 8:32 pm

هههههههههههههههههههههههه
صحيح يا موها
عمل ايه مع ابوة
وهيتجوزها واتقدم ليها
ولا تؤتؤ
عاوزين نعرف
الباقى

ماتريكس ابقى افتكرنى بقطعه جاتو
وحاجه ساقعه شويبس

الثلاثاء 28 يوليو 2009, 11:44 pm

تسلم ايدك ياموها
بجد القصة جميلة
والف مبروك

الخميس 06 أغسطس 2009, 5:54 pm

ههههههههههههههههههههه

تسلم ايدك يا قمر علي القصة الجامدة دي

والف الف مبروك علي الخطوبة وربنا يتمملك بخير يا موها يا رب

وعقبالنا احنا وبطة والموكوس هو كمان

الخميس 06 أغسطس 2009, 7:17 pm

الله يبارك فيك يا احمد
بس مين بطة والموكوس دول

السبت 08 أغسطس 2009, 12:08 pm

هههههههههههههههههههههه

اسألي نفسك مين بطة والموكوس

يا بنتي مش دول ابطال قصتك

الشاب اللي هايتجوز ( البطل ) امه بتقوله يا موكوس والاسم عجبني بصراحة

والبنت بنت اختها اللي مش هتتنيل وتتجوز الموكوس اسمها بطه

شكل الزهيمر بدأ يوصل عندكوا استخبي يلا