مش لاقية عنوان بس المهم ان الكلام يوصل

بسـم الله الرحمـن الرحيـم



ان الحمد لله نستعينه ونستغفره ونستعيذ به من شرور أنفسنا وسيئات أعمالنا ,
من يهده الله فلا مضل له ومن يضلل فلا هادى له
وأشهـد أن لا اله الا الله وحـده لا شريـك له
وأشهـد أن سيدنا محمـداً عبـده ورسـولــه
- صلـى الله عليه وسلم وعلى آله وصحبه , ومن تبعهـم باحسـان الى يوم الدين
وسلم تسليمـا كثيـرا ..

حبيت أكتب الكلام ده فى الأول كمقدمـة
ربنا يجازينا كلنا عظيم الثواب باذن الله


ظاهرة شائعة اوى الزمن ده خصوصا فى جيلنا احنا كشباب وبنات
وهى الخنقة والاكتئاب والتوهان والحيرة وعدم الراحة و و و ....



تعبان , مخنوق , اوف , زهقت , يارب اموت ,
عيشة قبر, ووووو ...


مش بنقول كده بردو ولا ايه ؟


..


بما ان تقريبا كلنا هنا شباب
وتقريبا بردو كلنا بنعانى من نفس حالة الخنقة

واننا تايهين ومش عارفين احنا مين ولزمتنا ايه
مش فاهمين الدنيا

فى دماغنا مليون سؤال عن الحياة
هى ايه ؟
لازمتى فى ايه ؟

وانا ليه بتظلم ؟
وليه الناس كده ؟

و غيره وغيره وغيره ...


..


عمالين نفكر
تعبنا من التفكير
حاسين اننا تايهين

مش عارفين نرتاح
مش قادرين
مش عارفين نوصل للطريق اللى يريحنا


...

اتكلمت مع كذا حد
الكل مخنوق ومقروف ومش طايق نفسه

كتير منهم مشاكله بسبب البيت واهله
وان ابوه خانقه ومسود عليه عيشته
وامه مش عارفة مالها
واخواته مش فاهمينه وكل واحد فيهم مع نفسه

ادخل عالفيس هتلاقى مية جروب وجروب
الى يقولك البيت خنقة يلا نهرب
والتانى ابويا خانقنى
ومالناش حد ولواحدنا وحاجات من نفس النظام ده


طب ليه ؟
ايه سبب كل ده ؟

ناس تقولك الحياة , الدنيا
اصلها دنيا حقيرة بتظلمنا ومش عارفة ايه

واللى يقولك الناس
اصل الناس دلوقتى كلها لمصلحتها ومفيش طيبين
ومحدش بيحب حد بجد

واللى يقولك اصل انا اصلا طيب وعلى نياتى
وبيضحك عليا من الناس بردو

وغيرو وغيرو من الاعذار


..


ناس تقولك الحياة حلوة بس نفهمها
ونعرف نضحك عليها
وناخدها على أد عقلها وهنعرف نعيشها

واللى يقولك الدنيا مالهاش ذنب احنا اللى فينا الذنب كلو


معرفش كلو كلام ملخبط كده مش عارفة اوصله بطريقة مرتبه


...

كلمة وقفتنى فى اغنية تامر عاشور

ماشيين بنصرخ مالألم شايلين فى هم
تايهين وليه الكل تايه مالعـذااب ؟!!


فعلا سؤال مهم
اجابته موجودة بس نسيناها

اجابته عارفينها

القرب من ربنا ..

..

مش هقعد اعيد وازيد فى كلام معروف
واعمل نفسى فيها وبتاع

بس هى دى الاجابة فعلا

...


طب ليه مانعملهاش ؟؟
ليه اما احنا عارفين الحل مانطبقهوش ؟؟


صــعـــــب




صعب ليه ؟؟

اصل الدنيا لهاية وبتنسينا وبتتوهنا
اصل الناس حواليا مش عارفة ايه


الله

يعنى على كده بئا مفيش مجال لينا اننا نرتاح ؟؟
مفيش مجال لينا اننا نعيش ؟؟
مفيش مجال لينا اننا نضحك بجد من قلبنا ؟؟


...


مش قادر أقوى عالحياة ولا قادر أقوى عالظروف
الخوف فى قلبى لمنتهاه , بفتح عينيا ومش بشوووف



كلام اغنية لاحمد فهمى

بينطبق بردو عاللى احنا فيه
صح ولا ايه ؟؟


...


كلام كتير واسئلة كتير وافكار اكتر

اتكلمت معاكو بلخبطة وطريقة مش مرتبه
بس اكيد ان شالله فاهمين


مش عارفة اقول ايه ولا انتوا هتقولوا ايه







أكيد محدش ماعندوش مشاكل
او بتحصل حاجة تدايقو او تنرفزو وكده .

بنت من سننا , شابة
شدت فى الكلام بينها وبين مامتها
دخلت اوضتها
وليه يارب بتعمل فيا كده
وليه انا اللى بعيش كده
نفسى حد يحس بيا نفسى حد يطبطب عليا
نفسى الاقى حد بيحبنى بئا
نفسى اعيش نفسى ارتاح
نفسى نفسى نفسى
وليه يارب !

من المثل ده عاوزة اطلع بحاجة
ان كل ماتمر علينا مشكلة بنقعد نجيب القديم والجديد
ونفتكر فى حاجات دايقتنا وتعبتنا
وجروح قديمة خفت و الزمن طيبها نعيدها ونفتحها تانى

حد حصلتلو مشكلة او ازمة
مدايق مخنوق شوية
فتح الكاسيت واداها كتاب حياتى عين
الفرح فيه سطرين والباقى كله عذاب
وقعد عاش مع المود وافتكر بردو اللى فات وزود ناره الطاق طاقين

وفى الاخر يقول ليه ومش قادر ارتاح ولا اقوى عالحياة
وليه بيحصلى كده

طب مانتا اللى عامل فى نفسك !

لو كنت اما اتخنقت مش هقول قرأت قرآن لانى قلت هنجيب حلول جنب ده
لو قمت كلمت حد ماشوفتوش من زمان
زورت قرايبك
طلعت اتمشيت مع نفسك شوية تريح اعصابك
وتفكر براحه

حط ضؤ ابيض دايما وسط الضلمة والخنقة والمشاكل
مش اى مشكلة تحصل تبقى نهاية الكون
فى عز ماتكون مدايق ومخنوق ابتسم
ولله اوقات البسمة دى حتى لو مش من القلب بتريح
لما يكون بايدك تعفو اعفو , ماتقعدش تزعق وتعمل بلبلة ومشكلة من لا شئ
العفو من شيم الكرماء
وأولى الناس بالعفو أقدرهم عالعقوبة

من الاخر كده
ماتدايقش نفسك عالفاضى
و زى مابيقولوا
كشكشهـــا , ماتعـرضهــــاش



النقطة التانية

أحلامنا
انا عندى حلم كنت عايشاله ونفسى احققه
كنت حاطاه قدام عينيا فى كل وقت
عايشاله وعايشة بيه
وكل مالحلم يبدأ يروح أجدده من تانى وأحييه
بعدين لقيت ان الحلم ده مش هيتحقق
انه انتهى وخيطه اتقطع ولا يمكن يتوصل تانى

شفت الدنيا سودة
وتعبت ونفسيتى كانت أسوأ مايكون
وقلت خلاص الحلم راح وانا رحت معاه
وانا كده انتهيت بئا وخلصت الحدوتة على كده

بعدين فكرت
طيب الحلم راح خلاص بس لسه موجود
بمعنى ان الحاجة دى انا كنت عاوزاها ملكى بس ربنا ماأرادش
مع انها معيشانى بس قلت خلاص بدل مش بتاعتى هبعد عنها

طب مالشمس مش ملك حد فينا
بس عايشين بيها ومانقدرش نستغنى عنها
وكلنا بنتدفى بيها وبتنورلنا طريقنا

يبقى انا ماينفعش ابعد واقول خلاص وانتهى وافضل قاعدة حاطة ايدى على خدى
والحاجة دى هتفضل جنبى وانا مش هستغنى عنها
حتى مع اختلاف المسميات ان هى ايه بالنسبة لى او انا ايه بالنسبة لها

عاوزة اقول
ان الضعف والاستسلام واليأس مالهومش فايدة
مالهومش حاجة غير انك هتضيع وياهم ..
يبقى فوق وشغل عقلك واستفيد من اللى ضاع ,
زى اعادة تدوير المخلفات
بيياخدوا المخلفات والقمامة وكده ويعملولها اعادة تضنيع
ويبدأوا يستفيدوا منها فى حاجات تانية ويبقى لها استخدامات تانية

فهمتوا قصدى ؟

طيب نيجى لحاجة كمان

الناس اللى شايفة ان مالهاش لازمة فى الدنيا
معظم الشريحة دى من المراهقين او الشباب
بتيجى لحظة توهان كده مايبقاش عارف نفسو ولا عارف هو عاوز ايه
وشايف ان مالوش لازمة او وجود
وانه مش هيغير حاجة فى الدنيا
وانه وانه وانه ..

طب استنى كده

مش ربنا له حكمة فى كل حاجة بيخلقها ؟
هل ربنا خلقك لهوا او عبثا ؟ - استغفر الله العظيم -
أكيد لأ

اكيد لحكمة من الله عز وجل
انت وجودك الاساسى دلوقتى هو تعمير الأرض
وانك تلتزم بأوامر ربنا وتشتغل وتخلص فى شغلك الحلال
وتكون أسرة تراعى ربنا فيها وفـ زوجتك وأهلك وأولادك
انك تتقى الله فى كل حاجة وفى كل حد

طيب وما بعد ذلك !

دور جواك
شوف انت بتحب ايه
اكيد جواك موهبة او صفة مميز بيها عن غيرك

بتحب القراءة , اقرأ فى اى مجال تحبه
اعرف وتعمق فيه
نسقه مع دراستك ..


مش عارف انت بتحب ايه ولا قادر توصل للموهبة اللى جواك ؟
تواصل مع اللى حواليك
خليهم هما يفيدوك ويقولولك شايفين فيك ايه مميز عن غيرك



حاجات بسيطة ومواقف صغيرة اوى
مابناخدش بالنا منها وبتعدى علينا
بس لو وقفنا عندها ونميناها ووظفناها صح
جايز تغير مجرى حياتنا كله


يبقى كده
- هنحاول نكون ملتزمين دينيا .
- هنظبط نفوسنا من جوه .
- مش هنخلى كل حاجة واى حاجة تأثر علينا بالسلب وتدايقنا .
- هنرسم الابتسامة دايما على وشوشنا ,
ولو مافرحتكش هتفرح غيرك
ويابخت مين كان السبب فى سعادة غيره ..
- هنعمل اعادة تدوير وتهيئة لاحلامنا اللى انكسرت .
- هندور جوانا على مواهبنا ومميزاتنا ونميها ونوظفها صح ونثبت نفسنا بيها .
وأخيرا لا تقنطوا من رحمة الله وماتقولش ليه وذنبى ايه يارب
وقول الحمد لله ..


الكلام ده قبل ماقولو لحد
كنت بقوله لنفسى

مش عاوزة حد يقرأ ويطلع زى مادخل زى ماخرج
واللى يخرج وجواه حبة عزيمة يحافظ عليهم ويزودهم
ويبدأ يشتغل بيهم فى لحظتها

وربنا يوفقكم ويريح بالكم دايما يارب