مشاكل وحلول..

القانون هو اللى بينظم العلاقة مابين البشر لازم يكون فى حاجة بتلزم الانسان بسلوك معين لان النفس امارة بالسوء
طب ولو القانون مينفعش يفصل فى حالات معينة يبقى الحل ايه تدخل بداله حاجة تكون بتتكلم فى الموضوع طيب ليه مينفعش ان الشريعة تاخد مكان القانون فى موضوع المعاكسة ده لأن عندنا ديانة تانية غير الاسلام
بصى يا ماما ربنا خلق الناس اقوام
يعنى مختلفين كل قوم بيختلف عن القوم التانى مصر مش زى السعوديه مش زى ليبيا مش زى امريكا مش زى اليابان كل واحد له طبيعته اللى اتشكلت من خلال المراحل اللى مر بيها ومن خلال طبيعة واصل الناس اللى عايشين فيه
عندنا فى مصر حاجة اسمها القانون واصله فرنسى مش مصرى يعنى و عندنا مصادر تانية للحكم منها الشريعة اللى اصلها الاسلام و ( العرف) وده جه من اعتياد الناس على تصرف معين فى مسألة معينة ركزى معايا فى العرف عشان حل كل المشاكل الاجتماعية اللى بتمر بيها مصر فى العرف ده
فى دول كتير اوى بينفع القانون ايه اللى مخلى اداءه ضعيف فى مصر مصر ليها طبيعة خاصة كلنا عارفين بعض ومش عارف فلان من عيلة فلان و فلان قريب فلان ده غير مفهوم الصحوبية اللى ليه فى مصر معنى اعمق كتير من اى بلد تانى و العلاقات فى مصر بشكل عام ليها مفهوم اعمق بكتير من اى بلد تانية يقولك مثلا الخال والد و الخالة والدة و اعز الولد ولد الولد تلاقى عندنا فى مصر لو الواحد جاتله مصلحة يحب يشرك حد فيها لو ندل اوى هيشرك اخوه بس لازم يشرك حد فيها و لو جت لحد مصيبة يحب يشترك هو فيها مفهوم (الواجب) و خدى بالك من الكلمة ديه
لو انا ماشى انا وواحد صاحبى و صاحبى اتخانق عندنا فى مصر بنعمل ايه ؟ هتخانق مع صاحبى حتى لو هو غلطان
و انك متعملش ده بيبقى اسمك ندل وواطى وجبان
لو واحد قريبى ابوه مات ومرحتش عزيت فيه يبقى اسمى مش صاحب واجب ومعفن
كذلك لو حد جاله فرح ومرحتش هنيت
لو جارى فى ازمة وموقفتش جنبه
هو ده بقى اللى بيدى مصر شكل لوحدها ان فى حاجة عندنا اسمها العرف واللى جاى من العادات والتقاليد هو اللى بينظم العلاقة فى الحاجات اللى مبيصلحش القانون انه يفصل فيها
القانون مبيحاسبش لو سيبت صاحبى بيتخانق وجريت او لو مرحتش عزيت حد عنده حزن او لو موقفتش جنب جارى فى وقت شده
لما ابتدينا ننفتح على العالم و بدات تحصل عندنا تغيرات فى تشكيل السكان هجرة من الريف للمدينة وبالعكس
وناس سافرت عاشت برة ورجعت وناس من برة جت عاشت هنا و عولمة ومش عارف ايه
كل الحاجات ديه دخلت بوظت الشكل اللى كنا بنتميز بيه ابتدى يتلاشى مفهوم العرف اللى هو لسة موجود فى بعض المناطق الريفية و خاصة فى الصعيد
و زى ده موضوع المعاكسة
لو انتى ماشية فى الشارع وواحد بصلك بصة جارحة او قالك كلمة جارحة ومكانش فى فى الشارع غير انتى وهو او كان فى ناس بس محدش لاحظ اللى هو عمله معاكى فى الحالة ديه لو لجأتى لحد فى الشارع هيقول طب ماهو جايز تكونى بتتبلى عليه واقسملك بالله ان البنات اللى من النوع ده بقوا نسبة محترمة مع فساد الاخلاق ده غير ان فى مرضى نفسيين طبعا اللى محدش بيبصلها واللى حلوة شوية و فاكرة ان الناس عاوزة تاكلها و اللى بتصادف يحصلها حركة غصب عن الراجل يعنى زى حكاية الميكروباص
( دماغ اللى بيعاكس-تانى تعليق ليا اخر قطعة)
طيب لو لجأتى للقانون الظابط اللى فى القسم عاوز دليل مادى يأما شهود و الناس مشافتش و محدش هيروح يشهد وهو مشافش و لو راح وهو مشافش يبقى شهادة زور ولو حتى كان اللى شهد عليه حصل بالفعل يبقى الحل ايه

فى الحالة ديه كان زمان بيدخل العرف كنا بنعمل قاعدة عرب يا جماعة فلانة بتقول ان فلان ده عمل كذا و اللى قاعدين عارفين فلان وفلانة ( ناس من اللى يعرفوا فلان وناس من اللى يعرفوا فلانة) عارفين فلان ممكن يعمل كده ولا لا وعارفين فلانة ممكن تكون من اللى بيتبلوا على الناس ولا لا و شوية اسئلة بسيطة للطرفين بنوصل للحقيقة فى اقل وقت ممكن ولو مذنب بيتحكم عليه و هوقاعد و بيكون عبرة لغيره
وبيقوم من المكان وهو عارف انه غلطان ومقتنع بعقابه ومش هيكرر اللى عمله تانى لأنه خلاص اتعلم عليه بالاحمر والفرصة اللى بقياله انه يثبت انه محترم و الا مش هيعرف يعيش فى وسط الناس اللى هم كانوا فى القاعدة
هو ده الحل لموضوع التحرش و اى مشكلة اجتماعية بتواجه المجتمع المصرى كل منطقة يكون ليها مكتب يتسمى زى ما يتسمى المجلس العرفى او اى حاجة يكون فيه كبير المنطقة راجل تكون الناس بتحترمه وتقدره او حتى نسبة من الناس والباقيين يلتزموا بيه ومعاه مجموعة من الرجال العقلاء الحكماء عشان لو وقت اللزوم حد غلط غلطة مينفعش القانون يفصل فيها يبقى المجلس ده هو اللى يفصل فيها و يدى كل واحد حقه بأسرع وقت ممكن ويخف الضغط عن المحاكم فى القضايا والمنازعات البسيطة وكمان اللى بتحتاج حكم سريع زى قضايا الاحوال الشخصية واحد ضرب مراته واحد مش عاوز يصرف على عياله واحدة لسنت على واحدة واحدة اتبلت على واحد كده

كده ممكن مصر ترجع مصر تانى و اهه حل مش محتاج لا انفاق ولا اى حاجة محتاج بس مجموعة من الرجال والنساء المحترمين ( المجلس يكون فيه رجالة وستات يعنى) و كلنا نعترف بيه . بس .

الشكر ليك انت ع الردود الحلوة