من مبارك الى شعب مصر .. أحمد فؤاد نجم

الثلاثاء 15 فبراير 2011, 12:39 pm

ياشعبي حبيبي ياروحي يابيبي
ياحاطك في جيبي يابن الحلال

ياشعبي ياشاطر ياجابر خواطر
ياساكن مقابر وصابر وعال

ياواكل سمومك يابايع هدومك
ياحامل همومك وشايل جبال

ياشعبي اللي نايم وسارح وهايم
وفي الفقر عايم وحاله ده حال

احبك محشش مفرفش مطنش
ودايخ مدروخ واخر انسطال

احبك مكبر دماغك مخدر
ممشي امورك كده باتكال

واحب اللي ينصب واحب اللي يكدب
واحب اللي ينهب ويسرق تلال

واحب اللي شايف وعارف وخايف
وبالع لسانه وكاتم ماقال

واحب اللي قافل عيونه المغفل
واحب البهايم واحب البغال

واحب اللي راضي واحب اللي فاضي
واحب اللي عايز يربي العيال

واحب اللي يائس واحب اللي بائس
واحب اللي محبط وشايف محال

واحبك تسافر وتبعد تهاجر
وتبعت فلوسك دولار او ريال

واحبك تطبل تهلل تهبل
عشان مطش كوره وفيلم ومقال

واحبك تأيد تعضض تمجد
توافق تنافق وتلحس نعال البغال

تحضر نشادر تجمع كوادر
تلمع وتقمع تظبط مجال

لكن لو تفكر تخطط تقرر
تشغل مخك وتفتح جدال

وتبدأ تشاكل وتعمل مشاكل
وتنكش مسائل وتسأل سؤال

وعايز تنور وعايز تطور
وتعمللي روحك مفرد رجال

ساعتها حجيبك لايمكن اسيبك
وراح تبقى عبره وتصبح مثال

حبهدل جنابك وأذل اللي جابك
وحيكون عذابك ده فوق الاحتمال

وامرمط سعادتك واهزأ سيادتك
واخلي كرامتك في حالة هزال

وتلبس قضيه وتصبح رزيه
وباقي حياتك تعيش في انعزال

حتقبل ححبك حترفض حلبك
حتطلع حتنزل حجيبلك جمااااال

الثلاثاء 15 فبراير 2011, 1:50 pm

حسبى الله ونعم الوكيل

اهو مرمى فى غيبوبه

اللهم لا شماته بس الواحد بيقول ان ربنا بياخد لينا حقنا

وعياله اتخانقوا مع بعض ومشاكل بالهبل

هو الى خرب دنيته واخرته

لو كان حاكم بيراعى ربنا كان زمانه انتهى نهايه كويسه كان التاريخ يزكره فى البدايه والنهايه بالخير

مش يجى اليوم الى يقول عليه حسبى الله ونعم الوكيل

حقنا عند ربنا يجيبه هو اللهم لك الحمد
على كل شئ

تسلم ايدك يا نونا